CNRP យកទីលានប្រជាធិបតេយ្យចាស់ ធ្វើជាកន្លែងជួបជុំគ្នា សម្រាប់ដង្ហែក្បួនឃោសនាធំ នៅថ្ងៃចុងក្រោយ
ថ្ងៃ ពុធ ទី ៣១ ខែ ឧសភា ឆ្នាំ ២០១៧ ម៉ោង ១៤:៥៨
លោក ម៉ន ផល្លា បញ្ជាក់ចុងក្រោយថា ក្បួនដង្ហែរបស់គណបក្សសង្គ្រោះជាតិ នឹងទៅឈប់នៅក្បែរសួនច្បារសម្តេចសង្ឃរាជ ជួន ណាត និងវិមានរដ្ឋសភា ហើយនឹងរំសាយនៅទីនោះតែម្តង។
ភ្នំពេញ៖ គណបក្សសង្គ្រោះជាតិ នឹងដង្ហែក្បួនឃោសនាធំ ជាលើកចុងក្រោយ ក្នុងរាជធានីភ្នំពេញ នៅថ្ងៃទី២ ខែមិថុនា ឆ្នាំ២0១៧។ ប៉ុន្តែ នៅពេលព្រឹក គណបក្សសង្គ្រោះជាតិ នឹងមិនដង្ហែឡើយ ដោយរង់ចាំរហូតដល់ពេលថ្ងៃ ទើបចាប់ផ្តើមដង្ហែ។
សេចក្តីប្រកាសព័ត៌មានរបស់គណបក្សសង្គ្រោះជាតិ បានឲ្យដឹងថា ចាប់ពីម៉ោង៧ព្រឹក នៅថ្ងៃទី២ ខែមិថុនា ឆ្នាំ២0១៧ អ្នកគាំទ្រនិងសកម្មជនគណបក្សសង្គ្រោះជាតិ នឹងទៅជួបជុំគ្នានៅទីលានប្រជាធិបតេយ្យចាស់ ក្បែររមណីយដ្ឋានវត្តភ្នំ ដើម្បីរៀបចំដង្ហែក្បួនឃោសនារកសំឡេងឆ្នោត សម្រាប់ការបោះឆ្នោតថ្នាក់ឃុំ-សង្កាត់ នាអាណត្តិទី៤នេះ។ ប៉ុន្តែ លោក ម៉ន ផល្លា ប្រធានគណៈកម្មការប្រតិ្តបត្តិគណបក្សសង្គ្រោះជាតិ ប្រចាំរាជធានីភ្នំពេញ បានប្រាប់សារព័ត៌តមានថ្មីៗ នៅពេលព្រឹកគណបក្សសង្គ្រោះជាតិ នឹងមិនដង្ហែក្បួនឃោសនាឡើយ ពោលគឺ អ្នកគាំទ្រនិងសកម្មជនទាំងអស់ គ្រាន់តែទៅជួបជុំគ្នាប៉ុណ្ណោះ ដើម្បីស្តាប់សារនយោបាយរបស់ថ្នាក់ដឹកនាំ។
លោក ម៉ន ផល្លា បន្តថា នៅម៉ោង២រសៀល ទើបគណបក្សសង្គ្រោះជាតិ ចាបផ្តើមដង្ហែក្បួនឃោសនា រហូតដល់ពេលយប់តែម្តង។ បើតាម លោក ម៉ន ផល្លា មូលហេតុដែលគណបក្សសង្គ្រោះជាតិ មិនដង្ហែក្បួនឃោសនានៅពេលព្រឹក គឺដើម្បីទុកសិទ្ធិឲ្យគណបក្សប្រជាជនកម្ពុជា ដែលប្រកាសថា មានអ្នកចូលរួមរាប់ម៉ឺននាក់ ដង្ហែមុន។
លោកនិយាយយ៉ាងដូច្នេះ៖«ថ្ងៃចុងក្រោយ គណបក្សសង្គ្រោះជាតិ ក៏ហែ ហើយគណបក្សប្រជាជនកម្ពុជា ក៏ហែ។ បើយើង ក៏ហែ ហើយគេហែ ប្រាកដជាជួបគ្នា ហើយនាំឲ្យកកស្ទះចរាចរយ៉ាងខ្លាំង និងនាំឲ្យការដង្ហែ អាចនឹងមានបញ្ហាផ្សេងទៀត ។ អ៊ីចឹង ពេលព្រឹក យើងសុខចិត្តឲ្យគណបក្សប្រជាជនកម្ពុជា ដង្ហែចុះ ហើយពេលថ្ងៃ គឺយើង ហែ រហូតដល់យប់តែម្តង»។
លោក ម៉ន ផល្លា បញ្ជាក់ចុងក្រោយថា ក្បួនដង្ហែរបស់គណបក្សសង្គ្រោះជាតិ នឹងទៅឈប់នៅក្បែរសួនច្បារសម្តេចសង្ឃរាជ ជួន ណាត និងវិមានរដ្ឋសភា ហើយនឹងរំសាយនៅទីនោះតែម្តង។
សូមបញ្ជាក់ថា គណបក្សសង្គ្រោះជាតិ បានដង្ហែក្បួនឃោសនាធំ ក្នុងរាជធានីភ្នំពេញ ចំនួន២លើករួចមកហើយ នៅក្នុងយុទ្ធនាការនៃការឃោសនារកសំឡេងឆ្នោត ក្នុងរយៈពេលជាង១0ថ្ងៃមកនេះ។ ការឃោសនារកសំឡេងឆ្នោត នឹងត្រូវបញ្ចប់នៅថ្ងៃទី២ ខែមិថុនា ឆ្នាំ២0១៧។ ការបោះឆ្នោតជ្រើសរើសក្រុមប្រឹក្សាឃុំ-សង្កាត់ នឹងប្រព្រឹត្តទៅនៅថ្ងៃទី៤ ខែមិថុនា ឆ្នាំ២0១៧៕
Post a Comment