រដ្ឋមន្ត្រីការងារ អំពាវនាវឲ្យសហគ្រាសរោងចក្រ ជួយសម្រួលដល់កម្មករនិយោជិកបានទៅចូលរួមបោះឆ្នោតឲ្យបានគ្រប់ៗគ្នា
ថ្ងៃ ចន្ទ ទី ២៩ ខែ ឧសភា ឆ្នាំ ២០១៧ ម៉ោង ១៦:១១
(ភ្នំពេញ) ៖ លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានអំពាវនាវដល់ម្ចាស់សហគ្រាសរោងចក្រត្រូវជួយសម្រួលពេលវេលាសមរម្យ និងបង្កលក្ខណៈងាយស្រួលដល់កម្មករនិយោជិកដើម្បីមានពេលវេលាគ្រប់គ្រាន់បានទៅបោះឆ្នោតជ្រើសរើសក្រុមប្រឹក្សាឃុំ-សង្កាត់ ដែលនឹងប្រព្រឹត្តទៅនៅថ្ងៃទី៤ ខែមិថុនា ខាងមុខនេះឲ្យបានគ្រប់ៗគ្នា។
ការអំពាវនាវរបស់លោក អ៊ិត សំហេង នេះ បានធ្វើឡើងនៅក្រោយជំនួបពិភាក្សាការងារ ជាមួយវិទ្យាស្ថានC.D.R.Iកាលពីល្ងាចថ្ងៃទី២៧ ខែឧសភា និងបន្ទាប់ពីគណៈកម្មការជាតិរៀបចំការបោះឆ្នោត ដែលហៅកាត់ គ.ជ.ប បានចេញសេចក្តីអំពាវនាវកាលពីថ្ងៃទី២៤ ខែឧសភាកន្លងទៅដោយឲ្យសហគ្រាសរោងចក្រជួយសម្រួលដល់កម្មករ-កម្មការិនីបានទៅបោះឆ្នោតឃុំ-សង្កាត់។
លោករដ្ឋមន្ត្រី ក៏បានអំពាវនាវឲ្យបងប្អូនប្រជាពលរដ្ឋ កម្មករ កម្មការិនី ទៅចូលរួមបោះឆ្នោតជ្រើសរើសក្រុមប្រឹក្សាឃុំ-សង្កាត់ដែលនឹងប្រព្រឹត្តទៅនៅថ្ងៃទី៤ ខែមិថុនា ខាងមុខនេះឲ្យបានគ្រប់ៗគ្នា ស្របតាមការអំពាវនាវរបស់គណៈកម្មការជាតិរៀបចំការបោះឆ្នោត ហៅកាត់ គ.ជ.ប ព្រោះនេះជាការអនុវត្តសិទ្ធិរបស់បងប្អូន។ លោករដ្ឋមន្ត្រីក៏បានស្នើឲ្យប្រជាពលរដ្ឋបោះឆ្នោតចំពោះគណបក្សណាដែលពេញចិត្ត និងគិតថាអាចជួយសម្រួលដល់ការងារ និងការរស់នៅកាន់តែល្អប្រសើរតាមសេចក្តីត្រូវការ និងចង់បាន។
ចំណែកលោក កេន លូ អ្នកនាំពាក្យសមាគមរោងចក្រកាត់ដេរ បានថ្លែងប្រាប់បណ្ដាញសារព័ត៌មានក្នុងស្រុកមួយនៅព្រឹកថ្ងៃទី២៩ ខែឧសភា នេះថា សមាគមរោងចក្របានធ្វើការណែនាំទៅរោងចក្រទាំងអស់ ធ្វើទៅតាមការណែនាំរបស់ គ.ជ.ប រួចហើយ។
រីឯ លោក ហង្ស ពុទ្ធា អ្នកនាំពាក្យគណៈកម្មការជាតិរៀបចំការបោះឆ្នោត បានមានប្រសាសន៍នៅព្រឹកថ្ងៃទី២៩ ខែឧសភាថាការកំណត់ថ្ងៃសម្រាប់កម្មករបានឈប់សម្រាកទៅបោះឆ្នោតនោះ គ.ជ.ប មិនមានអំណាច ឬដែនសមត្ថកិច្ចណាមួយក្នុងការបញ្ជាដល់ម្ចាស់សហគ្រាសរោងចក្រឲ្យអនុវត្តតាមនោះទេ។
គួរបញ្ជាក់ថា ការបោះឆ្នោតជ្រើសរើសក្រុមប្រឹក្សាឃុំ-សង្កាត់ នឹងប្រព្រឹត្តទៅនៅថ្ងៃទី៤ ខែមិថុនា ខាងមុខនេះ ដោយមានគណបក្សនយោបាយចូលរួមប្រកួតប្រជែងចំនួន១២ និងមានអ្នកមានចុះឈ្មោះបោះឆ្នោតជាង៧លាន ៨សែននាក់។
ជុំវិញការឈប់សម្រាកដើម្បីទៅចូលរួមបោះឆ្នោតនេះ ជាទូទៅនិយោជកអនុញ្ញាតអោយឈប់សម្រាកមួយថ្ងៃខណៈដែលគណបក្សប្រឆាំងក៏ដូចជាកម្មករនិយោជិតភាគច្រើនចង់បានពីរទៅបីថ្ងៃ ដោយសារឈប់មួយថ្ងៃមិនអាចធ្វើដំណើរទៅបោះឆ្នោតហើយវិលមកធ្វើការនៅថ្ងៃបន្ទាប់បានទេ ជាពិសេសសំរាប់អ្នកនៅខេត្តឆ្ងាយៗ៕
Post a Comment