ថ្ងៃ អង្គារ ទី ៦ ខែ មិថុនា ឆ្នាំ ២០១៧ ម៉ោង ១៤:២៨
(ភ្នំពេញ) ៖ ទោះបីមិនទទួលសំឡេងគាំទ្រពីប្រជាពលរដ្ឋ សម្រាប់តំណែងមេឃុំ និងចៅសង្កាត់ ក្ដី តែលោកសួន សេរីរដ្ឋាប្រធានគណបក្សអំណាចខ្មែរបានអះអាង លោកនឹងបង្កើតការិយាល័យដើម្បីធ្វើជាទីប្រឹក្សាដល់ពលរដ្ឋតាមដានការដឹកនាំរបស់មេឃុំនិងចៅសង្កាត់អាណត្តិទី៤នេះ។
លោកសួន សេរីរដ្ឋា បានសរសេរលើបណ្តាញសង្គមហ្វេសប៊ុករបស់លោកនៅថ្ងៃទី៥ មិថុនាថា លទ្ធផលបោះឆ្នោត ឃុំ សង្កាត់ដែលមានតែគណបក្សចំនួន២ទទួលតណែងជា មេឃុំ និងជាចៅសង្កាត់ច្រើនលើសលប់នាពេលនេះ គឺជាលទ្ធផលដ៏ល្អបំផុតសម្រាប់គណបក្សអំណាចខ្មែរដែលចាប់ពីខែកក្កដា ២០១៧នេះទៅ គណបក្សអំណាចខ្មែរនឹងបើកការិយាល័យទីប្រក្សាប្រជាពលរដ្ឋនៅតាមឃុំតាមសង្កាត់ដើម្បីបង្រៀន និងដឹកនាំពលរដ្ឋក្នុងឃុំ សង្កាត់ ទាមទារឲ្យមេឃុំ និងចៅសង្កាត់ ទាំងអស់នោះ អនុវត្តនូវគោលនយោបាយដែលគណបក្សរបស់ពួកគេប្រកាសសន្យា កាលពីពេលយុទ្ធនាការរកសំឡេងឆ្នោតកន្លងមកថ្មីៗនេះ។
លោកថា ការដែលគណបក្សលោកបង្កើតការិយាយល័យទីប្រឹក្សានេះ ដោយសារតែគណបក្សនយោបាយដែលជាប់ឆ្នោតនោះសុទ្ធតែបានសន្យាជូនម្ចាស់ឆ្នោតនៅពេលធ្វើយុទ្ធនាការស្វែងរកសំឡេងឆ្នោតកន្លងមក ក្នុងនោះរួមមានគណបក្សប្រជាជនកម្ពុជាបានសន្យារកទីផ្សារលក់ផលិតផលកសិកម្មរបស់ប្រជាកសិករឲ្យបានថ្លៃ រីឯគណបក្សសង្គ្រោះជាតិ សន្យាលុបបំបាត់ល្បែងស៊ីសងឧក្រិដ្ឋកម្មគ្រឿងញៀន និងទម្លាក់លុយ៥០ម៉ឺនដុល្លារឲ្យឃុំ សង្កាត់នីមួយៗធ្វើការអភិវឌ្ឍន៍ ។ ក្រៅពីនោះពួកគេក៏បានសន្យាថានឹងបម្រើធ្វើលិខិតស្នាមសាធារណៈឲ្យបានលឿនផងដែរ ។
សូមជម្រាបថាការលើកឡើងរបស់មេគណបក្សអំណាចខ្មែរនេះខណៈពេលលទ្ធផលក្រៅផ្លូវការនៃការបោះឆ្នោតឃុំ សង្កាត់គណបក្សប្រជាជនកម្ពុជាទទួលបានសំឡេងគាំទ្រ ១១៦៣ឃុំ សង្កាត់ និងគណប្សសង្គ្រោះជាតិទទួលបាន៤៨២ឃុំ សង្កាត់ និងគណបក្សខ្មែររួបរួមជាតិទទួលបាន១ ឃុំសង្កាត់នឹងគេដែរ ក្នុងចំណោមឃុំសង្កាត់សរុបទូទាំងប្រទេសមានចំនួន១៦៤៦ ៕
Post a Comment