ក្រុងប្រកាសធ្វើប្រឡាយស្ទឹងមានជ័យជាបេតុង, និងផ្តល់ប័ណ្ណកម្មសិទ្ធិជូនប្រជាជនរស់នៅតំបន់ប្រឡាយស្ទឹងមានជ័យ
ថ្ងៃ សៅរ៏ ទី ២៧ ខែ ឧសភា ឆ្នាំ ២០១៧ ម៉ោង ០៩:៤៣
(ភ្នំពេញ) ៖ លោកអភិបាលរាជធានីភ្នំពេញប្រកាសធ្វើប្រឡាយស្ទឹងមានជ័យជាប្រឡាយបេតុងដោយស្ថាបនាជាផ្លូវបេតុងអមសងខាងប្រឡាយចំណែកដីដែលនៅសល់នឹងត្រូវផ្តល់ប័ណ្ណកម្មសិទ្ធិជូនប្រជាជនរស់នៅតំបន់ប្រឡាយស្ទឹងមានជ័យ ដើម្បីឲ្យបងប្អូនរស់នៅមានស្ថានភាពល្អ មានប្រព័ន្ធលូ ប្រឡាយ និងផ្លូវធ្វើដំណើរបានស្រួល។
លោក ប៉ា សុជាតិវង្ស អភិបាលរាជធានីភ្នំពេញ បានលើកឡើងបែបនេះនៅក្នុងពិធីសំណេះសំណាលជាមួយប្រជាពលរដ្ឋ៤៨៤គ្រួសាររស់នៅតំបន់សហគមន៍ប្រឡាយស្ទឹងមានជ័យ និងចុះត្រួតពិនិត្យទីតាំងផ្ទាល់របស់សគមន៍ប្រឡាយស្ទឹងមានជ័យដើម្បីកែសម្រួសស្ថានភាពរស់នៅរបស់ប្រជាពលរដ្ឋ នៅតំបន់សហគមន៍ប្រឡាយស្ទឹងមានជ័យឲ្យបានល្អកាលពីព្រឹកថ្ងៃទី ២៦ឧខែសភាឆ្នាំ២០១៧នៅសង្កាត់ស្ទឹងមានជ័យ។
ក្នុងឱកាសនោះលោកអភិបាលរាជធានីបានណែនាំដល់មន្ទីរជំនាញ និងមន្ត្រីរដ្ឋបាលរាជធានីចុះពិនិត្យទីតាំងខាងលើឱ្យបានច្បាស់លាស់ ដើម្បីពិនិត្យលទ្ធភាពស្នើសុំទៅរាជរដ្ឋាភិបាល ធ្វើប្រទានកម្មជូនបងប្អូនប្រជាសហគមន៍ទៅតាមការស្នើសុំពីលោកចៅសង្កាត់និងលោកអភិបាលខណ្ឌមានជ័យខណៈដែលសហគមន៍មួយចំនួនកំពុងរំលោភយកដីប្រឡាយសាធារណៈរបស់រដ្ឋធ្វើជាកម្មសិទ្ធិបែបអនាធិបតេយ្យ។ លោកប៉ា សុជាតិវង្សបាន បញ្ជាក់ទៀតថា តាមគម្រោងដែលគ្រោង នឹងស្នើទៅរាជរដ្ឋាភិបាលនោះ គឺរដ្ឋបាលរាជធានី គ្រោងនឹងប្រគល់ដីទំហំ៥ម៉ែត្រគុណនឹង៨ម៉ែត្រ ជូនប្រជាពលរដ្ឋ ក្នុងមួយខ្នងផ្ទះ ដោយផ្តល់កម្មសិទ្ធិស្របច្បាប់តែម្តង។ លោក បន្តថា ជាគម្រោងតួប្រឡាយ៨ម៉ែត្រ ចិញ្ចើម២ ម៉ែត្រ សាងសង់ផ្លូវបេតុងទទឹង៦ម៉ែត្រ ផ្លូវមុខផ្ទះ៥ម៉ែត្រ ដីនៅសល់មុខផ្ទះ១,៥ម៉ែត្រ និងក្រោយផ្ទះ០,៥ម៉ែត្រ ហើយចំនួនខ្នងផ្ទះ៤២៣ខ្នង។លោកស្នើឲ្យមេភូមិចៅសង្កាត់ រក្សាស្ថិតិឲ្យបាន កុំឲ្យកើនឡើងដែលនាំឲ្យពិបាកដោះស្រាយ ជូនប្រជាពលរដ្ឋនិងនាំឲ្យរំខានដល់ការស្ថាបនាប្រឡាយនេះ។
លោកប៉ា សុជាតិវង្ស អភិបាលរាជធានីបន្តថាសហគមន៍ប្រឡាយស្ទឹងមានជ័យនេះ បន្ទាប់ពីស្តារប្រឡាយ ចាត់បេតុងថ្មីបន្ថែមការផ្តល់ប័ណ្ណកម្មសិទ្ធិជូន ក៏ដូចរៀបរយហេដ្ឋាសរចនាសម្ព័ន្ធបានល្អថែមទៀតនោះបងប្អូនប្រជាពលរដ្ឋពិតជារស់នៅបានស្ងប់អារម្មណ៍ដោយមានការយកចិត្តទុកដាក់គិតគូរពីសាលារាជធានីភ្នំពេញ ពិសេសប្រមុខរាជធរដ្ឋាភិបាល។
លោកប៉ា សុជាតិវង្ស បានលើកឡើងទៀតថា៖ រដ្ឋបាលរាជធានី នឹងស្តារប្រឡាយនេះ ដោយបុកស៊ីផាយ ដូចនៅប្រឡាយបាក់ទូកដែរ ដោយត្រូវធ្វើផ្លូវ៦ម៉ែត្រ ជាប្រភេទផ្លូវបេតុង រៀបចំតបណ្តាញទឹក ភ្លើងអគ្គិសនី ចូលផ្ទះប្រជាពលរដ្ឋ បើរៀបចំបានល្អរដ្ឋបាលរាជធានី នឹងដាក់បង្កោលភ្លើងសាធារណៈ នៅលើផ្លូវនេះថែមទៀត ធ្វើយ៉ាងណាឲ្យក្លាយជាទីក្រុងស្ទឹងមានជ័យតែម្តង ។ ប៉ុន្តែទោះបីជាយ៉ាងណាក្តី លោកអភិបាលរាជធានី សូមឲ្យប្រជាពលរដ្ឋចូលរួមទុកដាក់សម្រាមឲ្យបានល្អនិងចូលរួមធ្វើឲ្យភូមិសង្កាត់មានសុវត្ថិភាព។លោកអភិបាលរាជធានីភ្នំពេញបញ្ជាកដែរថា៖ ដើម្បីដោះស្រាយបញ្ហាលិចលង់ យើងបានកសាងលូប្រឡាយច្រើន ដើម្បីអូសទឹកឲ្យបានលឿន មិនត្រឹមតែប៉ុណ្តឹងទេ យើងធ្វើអណ្តូងលូ ដើម្បីកុំឲ្យដក់ទឹកនាំឲ្យខូចផ្លូវ។លោកអភិបាល បានបន្តទៀតថា៖ អាងស្តុបទឹកមួយចំនួន នៅរាជធានីភ្នំពេញ ត្រូវបានប្រជាពលរដ្ឋរំលោភយក ជាក់ស្តែងអាងស្តុបទឹកបឹងត្របែក ត្រូវបានប្រជាពលរដ្ឋយកជាកម្មសិទ្ធិ យើងមានអាងស្តុបហើយពិតជាមិនទាន់ដោះ បាននៅឡើយទេ នៅបញ្ហាលិចលង់ដោយយើងត្រូវកសាងស្ថានីយថែមទៀត ទើបដោះស្រាយបាន។
លោកអភិបាលបានរំលឹកថា៖អ្នករស់នៅលើប្រឡាយសាធារណៈ របស់រដ្ឋមិនច្រើនគ្រួសារទេ ប៉ុន្តែបើនិយាយពីផលប៉ះពាល់វិញគឺធ្វើឲ្យប្រជាពលរដ្ឋជាច្រើនគ្រួសារ នៅក្នុងរាជធានីទទួលផលប៉ះពាល់ដោយការលិចលង់ ដែលតម្រូវឲ្យរដ្ឋបាលរាជធានីភ្នំពេញជាអ្នកចេញមុខដោះស្រាយជាប្រយោជន៍ រួមរបស់ប្រជាពលរដ្ឋ។
លោកអភិបាលបានបញ្ជាក់ច្បាស់ថា៖ រដ្ឋបាលរាជធានីមកនេះមិនមែន មកឃោសនារកសំឡេងឆ្នោតទេ បំណងធំរបស់រដ្ឋបាលរាជធានី គឺមកពិភាក្សាជាមួយប្រជាពលរដ្ឋ រួមគ្នាដោះស្រាយលើផលប៉ះពាល់ប្រឡាយនេះ តបតាមការស្នើឡើងរបស់លោកចៅសង្កាត់ ចៅហ្វាយខណ្ឌ ដើម្បីពន្យល់ពួកគាត់ឲ្យបានយល់អស់ការសង្ស័យ ពីការអភិឌ្ឍន៍ប្រឡាយនេះ ស្របពេលដែលប្រឡាយស្ទឹងមានជ័យនេះ បានដើរតួយ៉ាងសំខាន់ ក្នុងការនាំទឹកទម្លាក់ចូលទៅបឹងទំពុន៕
Post a Comment