ថ្ងៃ ព្រហស្បត្ត៏ ទី ១៨ ខែ ឧសភា ឆ្នាំ ២០១៧ ម៉ោង ២០:១៥
(ឈុំផន -ថៃ ): ថ្នាំញៀនប្រភេទយ៉ាម៉ាប្រមាណ ជាង២លានគ្រាប់ត្រូវបានកំលាំងតម្រួតប្រឆាំងគ្រឿងញៀនថៃតាមប្រមាញ់បង្ក្រាបបានជាមួយជនសង្ស័យ លាក់ទុកនៅក្នុងរថយន្តលាយស៊ីម៉ង់ត៍ ខណ:កំពុងបើកបរតាមដងផ្លូវពីខេត្តឈៀងម៉ៃទៅកាន់ខេត្តសុងខ្លាកាត់តាមខេត្តឈុំផន ភាគខាងត្បូង ប្រទេសថៃ។
ការផ្សាយពីទូរទស្សន៍ប៉ុស្តិ៍លេខ៨ របស់ថៃបានអោយដឹងថា កាលពីថ្ងៃទី១៦ខែឧសភាឆ្នាំ២០១៧ វេលាម៉ោង១២ថ្ងៃត្រង់កំលាំងបង្ក្រាបគ្រឿងញៀនខេត្តឈុំផន បានចេញប្រតិបត្តិការឈរជើងនៅលើគោលដៅមួយកន្លែងក្នុងស្រុក ប៉ាក់ធីវ ខេត្តឈុំផនដើម្បីត្រួតពិនិត្យរកសារធាតុញៀនដែលកំពុងធ្វើចរាចរណ៍ខុសច្បាប់នៅតាមដងផ្លូវ ។
ដោយមានការសង្ស័យ និងយោងការផ្តល់ព័ត៌មានពីក្រុមពាលស៊ីពាលនោះ កំលាំងបានស្ទាក់ឃាត់រថយន្តមួយគ្រឿងប្រភេទលាយស៊ីម៉ង់ត៍ធុនធ្ងន់ដើម្បីឆែកឆេរ។
សមត្ថកិច្ចបាប្រទះឃើញមានសាក់កាដូជាច្រើនដែលអ្នកបើកបរទាំងពីរនាក់បានលាក់នៅក្នុងតួម៉ូដែលជាឧបករណ៍សម្រាប់លាយស៊ីម៉ង់ត៍ ។នៅក្នុងសាក់កាដូទាំងនោះមានថ្នាំញៀនប្រភេទយ៉ាម៉ាយ៉ាងច្រើនសន្ធឹកសន្ធាប់ដែលគេបានលាក់ទុកនិងធ្វើចរាចរណ៍នៅលើដងផ្លូវដែលសរុបថ្នាំញៀនទាំងអស់នៅគឺ មានចំនួន ២.២០០.០០០ គ្រាប់ ( ពីរលាន ពីរសែន គ្រាប់ ) ។
ជនសង្ស័យទាំងពីរនាក់បានសារភាពថា : ខ្លួនទទួលស៊ីឈ្នួល ដឹកថ្នាំញៀននេះអោយគេគឺដឹកចេញពីស្រុកហ្វាងខេត្តឈៀងម៉ៃឆ្ពោះទៅកាន់ស្រុកហាតយ៉ៃក្នុងខេត្តសុងខ្លាដោយយក់ទៅអោយម៉ូយនៅទីនោះនឹងទទួលបានប្រាក់ឈ្នួលចំនួន ៥០ម៉ឺនបាត។ប៉ុន្តែត្រូវសមត្ថកិច្ចស្ទាក់ចាប់បានដូច្នេះ។
សមត្ថកិច្ចនគរបាលបង្ក្រាបគ្រឿងញៀនថៃប្រកាសធ្វើសន្និសីទកាសែតអំពីលទ្ធផលនៃការបង្ក្រាបថ្នាំញៀនដ៏ច្រើនសន្ធឹកនេះហើយថាមុននេះកាលពីថ្ងៃទី១៣ឧសភា នគរបាលប្រឆាំងគ្រឿងញៀនថៃក្រុមផ្សេងក៏បានបង្ក្រាបអតីតនគរបាលខេត្ត២នាក់នៅខេត្តសារាំបុរី ភាគចាងត្បូងថៃដែរ ដោយរឹបអូសថ្នាំញៀនមេតំហ្វេតាមីន១,២លានគ្រាប់ កញ្ឆាស្ងួត ១,១តោន។
ក្រុមសមត្ថកិច្ចជំនាញកំពុងកសាងសំណុំរឿងបញ្ជូនខ្លួនជនសង្ស័យ ទាំងពីរនាក់ រួមជាមួយនឹងវត្ថុតាងទៅកាន់តុលាកា៕
Post a Comment